Դամասկոսի մէջ «Ազդակ» թերթի թղթակիցը հաղորդած թէ անցնող օրերուն անվտանգութեան
վերաբերող զարգացումները յատկանշուած էին Ժոպար եւ Քապուն շրջաններուն մէջ շարունակուող
մարտերով, որոնց պատճառով յաճախակիօրէն կը լսուէին թնդանօթներու հարուածներու ձայները: «Ազդակ»-ի
թղթակիցը նշած է որ կիրակի օր, աշխատանքի բերումով Քապունի մէջ գտնուող 40-ամեայ հայ
երիտասարդ մը ծանր վիրաւորուած է բախումներու պատճառով եւ հիւանդանոց տեղափոխուած ` բուժում
ստանալու համար: Անցնող օրերուն մայրաքաղաքի տարբեր խաղաղ թաղամասերուն մէջ արձանագրուած
են նաեւ քանի մը հրասանդի հրթիռներու հարուածներ: Ապու Ռումմանէ թաղամասին հանրային
պարտէզին մէջ, Ապպասիին հրապարակին վրայ, նաեւ նոյն շրջակայ թաղամասերուն վրայ ինկած
են քանի մը հրթիռներ` պատճառելով զոհեր եւ նիւթական վնասներ: Իսկ երէկ, Մազրաա շրջանին
մէջ գտնուող Իման մզկիթին մէջ ահաբեկչական պայթումի մը պատճառով զոհուած են յայտնի Շէյխ
Մոհամետ Սէյիտ Ռամատան Պութին եւ 14 հաւատացեալներ, կան նաեւ աւելի քան քառասուն վիրաւորներ: